Олунньу 13 күнэ Саха сирин үрдүнэн Төрөөбүт тыл күнүнэн бэлиэтэнэр. Биһиги оскуолабытыгар нэдиэлэ устата сахалыы саҥарыыны тарҕатар, сайыннарар, чиҥэтэр сыаллаах-соруктаах кылаас аайы түөрт күрэх арааһа биллэриллибитэ.
Биһиги, оскуоланы бүтэрээччи оҕолор буоларбыт быһыытынан, кыра кылаастарга холобур буолуохтаахпыт уонна барытыгар кыттыахтаахпыт диэн эрдэттэн салайааччыбытын кытта быһаарсыбыппыт. Өр кэм дистанционно үөрэммит буоламмыт оскуолаҕа күнүс көрсөр олус баҕалаах, иэйиилээх этэ. Аан маҥнай биһиги санаабытынан ордук ыарахан түһүмэх «Айымньы дьоруойа мин харахпынан» дии санааммыт ханнык кинигэни ылыахха сөбүй диэн толкуйга түспуппүт. Чуолкай биири билэрбит, балаҕаҥҥа олорор саҕанааҕыны көрдөрөр сатаммат, сахалыы таҥас билигин барыта аныгылыы муоданан тигиллэр. Онон арыый да бэттэх соҕустан билэрбит «Дьикти саас», «Анфиса», «Киһи биирдэ олорор» буолбуттара. Дьиҥэр, биирдии толоруоллуохтаах этэ буолуо, ону тоҕо эрэ хара маҥнайгыттан бары биир сюжеты көрбүппүт, хата үчүгэйгэ! Уопсай хартыынаны биир эрэ киһи көрдөрбөт буоллаҕа. «Дьикти саас» айымньынан тугу таҥнарбыт, хайдах уһуларбыт барыта пазл курдук олус түргэнник хомуллубутун иһин, оҥорор да процесспыт ис сүрэхпититтэн тахсыбыта, күлэн-салан уһуллубуппут. Испэр ол иһин да режиссёрдар, артыыстар, сценаристар, оператордар идэлэрин сөбүлүүллэр эбит дии саныыбын.
Кинигэ рекламалааһына ордук уустук этэ. Үбүлүөйдээх суруйааччылар элбэхтэр эрээри сахалыы кинигэни наһаа аахпаппыт манна көстөн кэллэ. Онон оҕолорго сүбэлиэм этэ, саха тыла ыарахан, онтон ыарахаҥҥа үөрэннэххэ – биһиги хас да төгүл күүстээх буолабыт. Улуу Ильмень күөлгэ буолбут түгэни кылаас чаастарыгар хас сыл аайы кэпсииллэр, дьэ ону түргэн соҕустук өйдүү охсон, хата, Георгий Валерьевич ааһан иһэрин тохтотон чуолкайдаспыппыт уонна туох баарбытынан кэпсээбиппит. Үчүгэй опыт!
Хоһооҥҥо Иван Гоголев - Кындыл «Баҕа санаа сулуһа» хоһоонун мин көрдөөн булбутум. Манна оскуоланы бүтэрэн эрэр оҕолорго саамай сөптөөх, инникигэ дьулууру түстүүр ис хоһоонноох диэн тута сөбүлээбитим. Хоһоон уһун, кылааһым оҕолоро аахпыт версиялара түөрт гыммыт биирэ эрэ, онон толорутун хайаан да ааҕаарыҥ диэн ыҥырабын! Онно Кындыл сулус диэн араас өйдөбүлүн барытын ыйар. Бу түһүмэххэ маҥнайгы миэстэни ылан үөрүү-көтүү бөҕөтө!
Мин аҕабын кытта «Саха өһүн хоһооно – олох муудараһа» түһүмэххэ сарсыардаттан айманан уһуллубуппут. Дьиҥ-чахчы курдук буоларын наадатыгар идеальнай хартыынаны таһаараары сценарийдамматаҕым. Төрөппүт оҕону иитэригэр булгуччу ол туох эмэ олохтон түгэн баар буолуохтаах дии санаабаппыт. Ханнык баҕарар кэмҥэ санаан кэлэн ыйытыаххын сөп буоллаҕа. Ол иһин «уол оҕо биир күн ат уорҕатыгар, биир күн ат адаҕатыгар» өс хоһоону аҕам күннээҕи олоххо дьиэ кэргэммит иһигэр хайдах быһаарара, өйдөтөрө «ыраастык» көстүбүтэ.
Бу да буоллар, кэмигэр биһиги да сүрэҕэлдьээбиппит, тугуй эмиэ диэн турардаахпыт, ол да буоллар ханнык да түгэҥҥэ сүрэҕэлдьээмэҥ. Олох биирдэ бэриллэр. Сотору кэминэн бүгүҥҥүнү саныыр олус минньигэс буолуо!
Сайыына
Киирэн керун:
https://www.instagram.com/tv/CaHTtykOuno/?utm_medium=copy_link «Айымньы дьоруойа мин харахпынан»
https://www.instagram.com/tv/CaPAWSrPnNC/?utm_medium=copy_link «Кинигэ – киhи доҕоро»
https://www.instagram.com/tv/CaGksPgplwK/?utm_medium=copy_link «Баҕа санаа сулуһа» Иван Гоголев – Кындыл хоhоонун ааҕыы
https://www.instagram.com/tv/CaRuDJAtS10/?utm_medium=copy_link Өс хоhоону быhаарыы
Комментариев нет:
Отправить комментарий